Արգենտինան նվաճել է աշխարհի առաջնությունը, Մեսին վերջապես բարձրացրել է գլխավոր գավաթը

Արգենտինայի հավաքականը դարձել է ֆուտբոլի աշխարհի չեմպիոն։ Կատարում կայացած եզրափակչում արգենտինացիները 11 մետրանոցների շարքում 4:2 հաշվով հաղթել են Ֆրանսիայի հավաքականին՝ հիմնական և լրացուցիչ ժամանակում 3:3 ոչ-ոքիից հետո։

Լիոնել Մեսին խփել է երկու, Անխել Դի Մարիան՝ մեկ գոլ։ Ֆրանսիացիների կազմում հեթ-տրիկ է ձևակերպել Կիլիան Մբապեն։ Վճռորոշ 11 մետրանոցն իրացրել է Գոնսալո Մոնտիելը։

Արգենտինայի համար սա աշխարհի չեմպիոնի երրորդ տիտղոսն է 1978 և 1986 թվականներից հետո։ Մեսին ճանաչվել է մրցաշարի լավագույն խաղացող, իսկ ութ գոլով Մբապեն դարձել է լավագույն ռմբարկու։

Հաղթանակը տոնելու համար Բուենոս Այրեսի փողոցներ են դուրս եկել հարյուր հազարավոր մարդիկ։