Իսպանիան չորրորդ անգամ դարձել է Եվրոպայի չեմպիոն

Իսպանիայի հավաքականը նվաճել է ֆուտբոլի Եվրոպայի առաջնությունը։ Բեռլինի Օլիմպիական մարզադաշտում կայացած եզրափակչում Լուիս դե լա Ֆուենտեի թիմը 2:1 հաշվով հաղթել է Անգլիային։

Իսպանացիները առաջ են անցել երկրորդ խաղակեսի սկզբին Նիկո Ուիլյամսի գոլով։ Քոուլ Փալմերը հավասարեցրել է հաշիվը, սակայն ավարտից չորս րոպե առաջ հաղթական գոլը խփել է Միկել Օյարսաբալը։

Իսպանիան դարձել է Եվրոն չորս անգամ նվաճած առաջին հավաքականը։ Կիսապաշտպան Ռոդրին ճանաչվել է մրցաշարի լավագույն խաղացող, 17-ամյա Լամին Յամալը՝ լավագույն երիտասարդ խաղացող։

Անգլիան անընդմեջ երկրորդ անգամ պարտվել է Եվրոպայի առաջնության եզրափակչում։