ԱՄՆ հարվածը Բաղդադում. զոհվել է «Կուդս» ուժերի հրամանատար Ղասեմ Սոլեյմանին

Իսլամական հեղափոխության պահապանների կորպուսի «Կուդս» հատուկ ուժերի հրամանատար, գեներալ Ղասեմ Սոլեյմանին զոհվել է Բաղդադի միջազգային օդանավակայանի մոտ ամերիկյան անօդաչուի հարվածից։ Նրա հետ զոհվել է նաև Իրաքի Ժողովրդական մոբիլիզացիայի ուժերի հրամանատարի տեղակալ Աբու Մահդի ալ-Մուհանդիսը։

Պենտագոնը հայտարարել է, որ գործողությունն իրականացվել է նախագահ Դոնալդ Թրամփի անմիջական հրահանգով։ Վաշինգտոնի պնդմամբ՝ Սոլեյմանին հարձակումներ էր նախապատրաստում տարածաշրջանում ամերիկացի դիվանագետների և զինծառայողների դեմ։

Իրանի գերագույն առաջնորդ այաթոլլա Ալի Խամենեին եռօրյա սուգ է հայտարարել և «կոշտ վրեժ» խոստացել։ Լուրից հետո նավթի գները բարձրացել են ավելի քան 3 տոկոսով։

Լարվածության սրումը հատուկ մտահոգություն է առաջացնում Հայաստանում, որը սահմանակից է Իրանին և սերտ տնտեսական կապեր ունի նրա հետ։