Ջո Բայդենը հաղթում է ԱՄՆ նախագահական ընտրություններում

Դեմոկրատական կուսակցության թեկնածու Ջո Բայդենը հավաքել է հաղթանակի համար անհրաժեշտ 270 ընտրիչի ձայնը։ Առաջատար ամերիկյան ԶԼՄ-ները նրան ընտրված նախագահ են հայտարարել այն բանից հետո, երբ նա առաջ անցավ Փենսիլվանիայում։

Բայդենը կդառնա ԱՄՆ 46-րդ նախագահը։ Նրա թիմակից Քամալա Հարիսը կդառնա փոխնախագահի պաշտոնը զբաղեցնող առաջին կինը, ինչպես նաև առաջին սևամորթ և ասիական ծագմամբ անձը։

Գործող նախագահ Դոնալդ Թրամփը չի ընդունում պարտությունը։ Նրա նախընտրական շտաբը խոստանում է մի շարք նահանգներում դատարաններում վիճարկել քվեարկության արդյունքները։

Ընտրություններին մասնակցությունը ռեկորդային է եղել ավելի քան հարյուր տարվա ընթացքում։ Համավարակի պատճառով միլիոնավոր ամերիկացիներ քվեարկել են վաղաժամ և փոստով, ինչը երկարաձգել է հաշվարկը։