Երևանի օպերային թատրոնը կբացի Փոքր համերգասրահ

Ալեքսանդր Սպենդիարյանի անվան օպերայի և բալետի ազգային ակադեմիական թատրոնը կբացի նոր հարթակ՝ Փոքր համերգասրահը, որը կտեղակայվի նախկին Օպերային ակումբի տարածքում։

Խորհրդանշական բացումը տեղի կունենա նոյեմբերի 1-ին՝ կոմպոզիտոր Ալեքսանդր Սպենդիարյանի ծննդյան 155-ամյակի օրը։ Այդ մասին մամուլի ասուլիսում հայտնել են կրթության, գիտության, մշակույթի և սպորտի փոխնախարար Տիգրան Վիրաբյանը և թատրոնի տնօրեն Կարեն Դուրգարյանը։

Վիրաբյանի խոսքով՝ կառավարության ջանքերով 1050 քառակուսի մետր մակերեսով տարածքը վերադարձվել է թատրոնին և կօգտագործվի բացառապես գեղարվեստական և մշակութային գործունեության համար։

Նոր դահլիճում տեղի կունենան կամերային համերգներ, մանկական օպերային և բալետային ներկայացումներ։