Օրբանի դարաշրջանն ավարտվել է. Պետեր Մադյարի կուսակցությունը հաղթում է Հունգարիայի ընտրություններում

Վիկտոր Օրբանի 16-ամյա կառավարումն ավարտվել է։ Հունգարիայի խորհրդարանական ընտրություններում համոզիչ հաղթանակ է տարել 45-ամյա Պետեր Մադյարի գլխավորած «Տիսա» կուսակցությունը. Մադյարը նախկինում իշխող կուսակցության անդամ էր։

Նախնական տվյալներով՝ ձայների ավելի քան 98 տոկոսի հաշվարկից հետո «Տիսան» ստանում է խորհրդարանի 138 մանդատ, Օրբանի «Ֆիդեսը»՝ 55, ծայրահեղ աջ «Մեր հայրենիքը»՝ 6։

«Մենք դա արեցինք։ Միասին մենք տապալեցինք հունգարական ռեժիմը»,— հայտարարել է Մադյարը խորհրդարանի շենքի դիմաց՝ Դանուբի ափին կայացած հանրահավաքում։

Ընդդիմության հաղթանակը կարող է փոխել Բուդապեշտի դիրքորոշումը Եվրամիության ներսում, որտեղ Օրբանի կառավարությունը հաճախ արգելափակում էր որոշումները, այդ թվում՝ Ուկրաինային օգնության վերաբերյալ։