Լեհաստանը հակադիվերսիոն գործողություն է սկսել Կալինինգրադի մարզի հետ սահմանին

Լեհաստանը լրացուցիչ ուժեր է տեղակայել Ռուսաստանի Կալինինգրադի մարզի հետ սահմանին՝ լայնածավալ հակադիվերսիոն գործողություն իրականացնելու համար։ Այս մասին RMF FM ռադիոկայանի եթերում հայտնել է Լեհաստանի ոստիկանության գլխավոր հրամանատար Մարեկ Բորոնը, ինչպես փոխանցում է NEWS.am-ը։ Կանխարգելիչ գործողությունների առիթ են հանդիսացել հոկտեմբերի վերջին ստացված դաշնակիցների ռազմական հետախուզության և հատուկ ծառայությունների նախազգուշացումները Մոսկվայի կողմից հնարավոր սադրանքների, այդ թվում՝ զինված ներթափանցման փորձերի մասին։

Միջոցառումները ընդգրկում են Վարմիա-Մազուրի և Պոդլյասկի վոևոդությունները։ Գործողությունն իրականացվում է ոստիկանության ստորաբաժանումների կողմից՝ ցամաքային զորքերի, սահմանապահ ծառայության և հետախուզական ծառայությունների աջակցությամբ։ Մերձսահմանային գոտի են ուղարկվել հակաահաբեկչական ստորաբաժանումների մարտիկներ, իսկ գործընթացների ընդհանուր կառավարման համար ոստիկանության գլխավոր հրամանատարությունում հատուկ համակարգող կենտրոն է բացվել։

Սա ուղղակիորեն կապված է մեր երկրում տեղի ունեցող դիվերսիաների, ինչպես նաև արևելյան հատուկ ծառայությունների հիբրիդային հանցավոր գործունեության հետ։ Մենք պարտավոր ենք պաշտպանել մերձսահմանային շրջանների բնակիչներին և այնտեղ տեղակայված օբյեկտները ցանկացած հնարավոր սպառնալիքներից։

Միաժամանակ, լեհական իշխանությունները ամրապնդում են մշտական ռազմական ներկայությունը անկլավի հետ սահմանների երկայնքով։ Մինչև 2026 թվականի վերջը նախատեսվում է ամբողջությամբ ձևավորել տարածքային պաշտպանության Վարմիա-Մազուրի բրիգադը, որի խնդիրը ներխուժման դեպքում սահմանների պաշտպանությունն է։ Բրիգադի հրամանատար Ցեզարի Կիշկովյակը պարզաբանել է, որ զինվորականները վերահսկելու են իրավիճակը Սուվալկիի միջանցքի մոտ՝ ՆԱՏՕ-ի համար ռազմավարական նշանակություն ունեցող հարյուր կիլոմետրանոց անցումի, որը կապում է Բալթիկան դաշինքի մյուս անդամների հետ և բաժանում Բելառուսը Կալինինգրադի մարզից։ Ստորաբաժանումների համալրման և վերազինման գործընթացը երկու տարի կտևի։

Տարածաշրջանի հարևան պետությունները նույնպես նախազգուշական միջոցներ են ձեռնարկում։ Դեռ հոկտեմբերի սկզբին Լիտվան զորակազմ էր ուղարկել Կալինինգրադի մարզի հետ սահմանին։ Վիլնյուսը տեղափոխումը բացատրել է թշնամաբար տրամադրված օտարերկրացիների հոսքի վտանգով՝ մատնանշելով լատվիա-բելառուսական սահմանին տեղի ունեցած միջադեպը, որտեղ անօրինական ներգաղթյալների մի խումբ փորձել էր ճեղքել սահմանը զինված մարդկանց ուղեկցությամբ։