Էլինա Դանիելյանը կանանց ակումբային Եվրոպայի գավաթի արծաթե մեդալակիր է

Լյուքսեմբուրգի CE Gambit Bonnevoie ակումբը, որի կազմում հանդես է գալիս հայ գրոսմայստեր Էլինա Դանիելյանը, Չեռնոգորիայի Բուդվա քաղաքում կայացած շախմատի կանանց ակումբային Եվրոպայի 30-րդ գավաթում զբաղեցրել է երկրորդ տեղը։

Թիմի կազմում հանդես են եկել նաև գրոսմայստեր Աննա Ուշենինան Ուկրաինայից, միջազգային վարպետներ Կլաուդիա Կուլոնը և Ալեքսանդրա Մալցևսկայան Լեհաստանից և կանանց գրոսմայստեր Նարմին Խալաֆովան Ադրբեջանից։

Դանիելյանը յոթ պարտիայից վաստակել է հինգ միավոր և երրորդ տախտակում նվաճել անհատական արծաթ։

Էլինա Դանիելյանը հայ ամենատիտղոսակիր շախմատիստուհիներից է, բազմիցս մասնակցել է շախմատային օլիմպիադաների Հայաստանի հավաքականի կազմում։