Հայաստանում հայտարարվել է արտակարգ դրություն

Հայաստանի կառավարությունը կորոնավիրուսի տարածման պատճառով երկրում արտակարգ դրություն է հայտարարել։ Ռեժիմը սահմանվում է 30 օրով՝ մինչև ապրիլի 14-ը։

Այդ ընթացքում արգելվում են ավելի քան 20 մասնակցով հավաքները, փակվում են դպրոցները, քոլեջները, բուհերն ու մանկապարտեզները։ Օտարերկրացիների մուտքը սահմանափակվում է, ՀՀ քաղաքացիները կարող են վերադառնալ հայրենիք։

Ռեժիմի պարետ է նշանակվել փոխվարչապետ Տիգրան Ավինյանը։ Նրա ղեկավարությամբ ստեղծվել է հանձնաժողով, որը որոշումներ կկայացնի լրացուցիչ սահմանափակումների վերաբերյալ։

Վարչապետ Նիկոլ Փաշինյանը քաղաքացիներին կոչ է արել հնարավորության դեպքում մնալ տանը և խուճապի չմատնվել։ Նրա խոսքով՝ երկրում պարենի և դեղորայքի պաշարները բավարար են։