Գնդասարի արգելոցում տեսախցիկ-թակարդները նոր ընձառյուծ են նկարահանել

Զանգակատուն գյուղի Գնդասարի համայնքային պահպանվող տարածքում տեսախցիկ-թակարդները հոկտեմբերի 9-ին և 13-ին նոր առաջավորասիական ընձառյուծ են գրանցել, հայտնում է WWF-Հայաստանը։ Սա 2025 թվականից ի վեր այստեղ նկատված երկրորդ ընձառյուծն է։

Գիշատչին անվանել են Աղասի՝ ի պատիվ տարածքի պահապանի, որի տեսախցիկները նկարահանել են կենդանուն։ Աղասին արգելոցի պահպանությանը մասնակցում է դրա ստեղծման պահից՝ 2018 թվականից։

WWF-ում կարծում են, որ այս արդյունքը բնության պահպանության համայնքային մոտեցման արդյունավետության ևս մեկ ապացույց է։

Արգելոցը ստեղծվել է Կովկասի էկոտարածաշրջանային միջանցքների հիմնադրամի շրջանակում՝ ՀՀ շրջակա միջավայրի նախարարության և Գերմանիայի տնտեսական համագործակցության դաշնային նախարարության աջակցությամբ՝ KfW բանկի միջոցով։