Երևանում անցկացվել է Firebird Build հաքաթոնը՝ 105 հազար դոլար մրցանակային ֆոնդով

Սեպտեմբերի 26–27-ը Երևանում՝ AI9 ստարտափ կամպուսում, անցկացվել է Firebird Build հաքաթոնը։ Ինժեներներն ու հետազոտողները 24 ժամում ստեղծել են արհեստական բանականության վրա հիմնված արտադրանքների աշխատող նախատիպեր։

Միջոցառումը կազմակերպել է Firebird ընկերությունը OpenAI-ի, NVIDIA-ի, Picsart-ի, Առաջատար տեխնոլոգիաների ձեռնարկությունների միության (ԱՏՁՄ), AI9-ի և YerevaNN-ի հետ համատեղ։ Մրցանակային ֆոնդը, ներառյալ API-ի օգտագործման կրեդիտները, կազմել է 105 հազար դոլար։

Թիմերն աշխատել են ռոբոտաշինության, առողջապահության, շրջակա միջավայրի պահպանության, կիբեռանվտանգության և այլ ոլորտների լուծումների վրա։ ԱՏՁՄ գործադիր տնօրեն Էդիտա Ղազարյանի խոսքով՝ ստացվել է ավելի քան 500 հայտ, մասնակցել է նաև թիմ Վրաստանից։

«Մեր նպատակն է օգնել ներուժը վերածել նոր արտադրանքների և ընկերությունների»,— ասել է Firebird-ի համահիմնադիր Ալեքսանդր Եսայանը։