Հռոմում և Եվրոպայի այլ քաղաքներում ինքնաթիռները զննվել են պայթյունի սպառնալիքի պատճառով

Նոյեմբերի 3-ին Հռոմում վայրէջքից հետո Ryanair ավիաընկերության երկու ուղևորատար ինքնաթիռ է զննվել պայթյունի ենթադրյալ սպառնալիքների պատճառով։ Ինչպես հաղորդում է Հայաստանի հանրային ռադիոն՝ հղում անելով BBC-ին, Իտալիայում տեղի ունեցածը դարձել է նմանատիպ միջադեպերի շարքի մի մասը, որոնք ազդել են մի շարք ավիաչվերթների վրա։

Ավելի վաղ ևս չորս այլ չվերթներ վայրէջք են կատարել եվրոպական օդանավակայաններում այն բանից հետո, երբ դրանք նույնպես դարձել են ականապատման սպառնալիքների մասին հաղորդագրությունների թիրախ։ Ստացված ազդանշանների կապակցությամբ պրոֆիլային ծառայությունները սկսել են անվտանգության լայնածավալ ստուգումներ։

Վարշավայում զննության են ենթարկվել երկու օդանավ, այդ թվում՝ Լոնդոնի Հիթրոու օդանավակայանից թռիչք կատարած ինքնաթիռը։ Մանչեսթերից ուղևորվող մեկ այլ լայներ ստուգվել է մասնագետների կողմից իսպանական Մուրսիա քաղաքում։ Մուրսիայի տեղական իշխանությունների պաշտոնական ներկայացուցիչը հայտարարել է, որ օդանավի մեջ պայթուցիկ նյութեր չեն հայտնաբերվել։

Բացի այդ, բուլղարական լրատվամիջոցները հայտնել են Սոֆիայի օդանավակայանում ինքնաթիռի վայրէջքի մասին՝ նմանատիպ սպառնալիք ստանալուց հետո։

Այս միջադեպերը տեղի են ունեցել այն բանից մեկ օր անց, երբ Լոնդոնի Լութոնից Սոֆիա թռչող չվերթը արտակարգ վայրէջք է կատարել Բուդապեշտում՝ ռումբի առկայության մասին ստացված հաղորդագրության պատճառով։