ChatGPT չաթբոտը հինգ օրում միլիոն օգտատեր է հավաքել

OpenAI ընկերությունը նոյեմբերի 30-ին անվճար մուտք է բացել GPT-3.5 լեզվական մոդելի վրա հիմնված ChatGPT չաթբոտին։ Ընկերության ղեկավար Սեմ Օլթմենի խոսքով՝ հինգ օր անց օգտատերերի թիվը գերազանցել է միլիոնը։

ChatGPT-ն կարողանում է պատասխանել հարցերին, տեքստեր գրել, կոդ բացատրել և երկխոսություն վարել։ Սոցցանցերը լցվել են նրա աշխատանքի օրինակներով՝ բանաստեղծություններից մինչև ծրագրեր։

Փորձագետները նշում են, որ բոտը հաճախ վստահորեն սխալ տեղեկատվություն է տալիս, ինչպես նաև հարցեր է առաջացնում կրթության մեջ գրագողության վերաբերյալ։ Որոշ դպրոցներ արդեն քննարկում են դրա օգտագործման սահմանափակումներ։

Հայկական ՏՏ ընկերություններն ու ստարտափները սկսել են փորձարկել մոդելի հնարավորությունները։ Ծառայությունն աշխատում է նաև հայերենով, թեև պատասխանների որակն այդ լեզվով դեռ նկատելիորեն ցածր է, քան անգլերենով։